Святые по вѣкамъ

ПОСЛѢ XV ВѢКА

Кроткое и тихое и еже ко злобамъ человѣческимъ терпѣливое зѣло потребно есть всѣмъ вкупѣ вѣрнымъ, наипаче же священникомъ Вышняго, по глаголющему Божественному гласу: возмѣте иго мое на себе и учитеся отъ Мене, яко кротокъ есмь и смиренъ сердцемъ; [1] противу же пререкущихъ и противящихся благовѣрію и развратити его словомъ же и дѣломъ тщащихся и питомыя его въ свою ихъ прелесть прелагающихъ праведно есть и зѣло потребно намъ воспріяти, юже по благовѣрію, похвальную божественную ревность всею душею, по глаголющему пророку: не ненавидящая ли Тя, Господи, возненавидѣхъ и о вразѣхъ твоихъ истаяхъ, совершенною ненавистію возненавидѣхъ ихъ: во враги бышя мнѣ. [2] Кто кротчайшій боговидца Моѵсея? но егда видѣ людей беззаконновавшихъ и Вышняго прогнѣвавшихъ своимъ ихъ безуміемъ, кротость свою отложивъ по смотрѣнію, не пощадѣ старца и юношь, старицу и юнну, но безъ милости повелѣ ревнителемъ закону, левитяномъ, убивати оружіемъ вся по ряду; аще и сродники суть, аще стары, аще млады, понеже забывше многихъ и великихъ Божіихъ благотвореній и чюдесъ, ко идолослуженію уклонилися. Такожде да возлюбимъ ревность юже по Бозѣ, Финеесову похвальную, иже копіемъ прободь Замбрія, князя израильтянина и мидіанитянину на самомъ гнусодѣяніи; якоже есть писано [3]: и ста Финеесъ и угоди, и преста сѣчь, сирѣчь еже по Божію гнѣву истребленіе людей іудейскихъ. Егда во единъ день падоша 23 тысящи единаго ради грѣха блуднаго, коль чюдна убо ревность та онаго чюднаго мужа; не точію бо Божію ярость велію и праведну преставила отъ языка израильтянина, но и еще, рече вмѣнися ему въ правду въ родъ и родъ. Оставляю глаголати яже о пречудномъ Иліи и Елисеи, елика они, по ревности Божіи, содѣяша о славѣ Божіи и спасеніи языка іудейскаго. Исправленіе же блаженнѣйшаго архіерея Льва Катанскаго кто не вѣсть? паче же кто, слышавъ, не ужаснется иже о скверномъ Иліодорѣ волхвѣ? на время не мало долготерпѣвъ всякимъ дѣломъ смущающемъ священную паству Спаса Христа и поругающемся ей, наконецъ разумѣвъ его неизцѣльными недугующа, къ тому не стерпѣ его. Иліодору бо, во время вечернихъ пѣсній и волхованій сатанинскими просмутившу божественныя пѣсни, божественною ревностію разжегся святитель Божій Левъ пречудный, изъ олтаря текъ со тщаніемъ и омофоромъ своимъ содерзновеніемъ шею Иліодорову объемъ, привлекъ его даже до торгу и, ту огню велику возгнѣщьшуся по его велѣнію, привлече его, влѣзлъ съ нимъ во огнь и пребысть тамо божественный архіерей, предержа его омофоромъ, дондеже изгорѣ весь скверный онъ бесовомъ ученикъ и служитель; святитель же Вышняго и велемудрый поборникъ благовѣрію, Левъ изыде невредимъ, ниже власу единому его огнемъ опалѣвшу. Тѣхъ же и вы якоже сотаинники и тѣхъ же имъ таинствъ строителе, подражающе, туюжъ имъ ревность и подвигъ за благочестіе воспріимите вседушьно и смущающая è, иже аще ни будутъ, не посрамляйтесь, ниже обинуйтесь, но апостольски противитеся, единомудренно и единодушно съ приличнымъ дерзновеніемъ святителемъ Божіимъ православнымъ, и смутившаго убо паству Спасову предадите внѣшней власти въ казнь, да и ины накажутся не приложити имъ смущати овця Спасовы, ни приложити въ землю нашу православную. Кое бо сообщеніе вѣрну съ безвѣрникомъ? Они распяли. Емуже мы покланяемся, въ Негоже и вѣровахомъ и спасаемся; онижъ безпрестани кленутъ, Егоже мы день и нощь благословляемъ и славимъ со Отцемъ и Святымъ Духомъ. Соблюдите землю нашу чисту и невредну отъ таковыхъ бѣшеныхъ псовъ. Будьте сопричастницы древнимъ ревнителемъ, да и вы тѣхъ же имъ вѣнець и хваленій получите въ грядущій вѣкъ о Христѣ Ісусѣ Господѣ нашемъ, Емуже слава въ безконечны вѣки со безначальнымъ Отцемъ и со Святымъ Духомъ. Аминь.

Примѣчанiя:
[1] Матѳ. 11: 29.
[2] Псал. 138: 21.
[3] Числ. 25: 7.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 42-45.