Канон, глас 6.

Песнь 3.

Ирмос: Несть свят, якоже Ты, Господи Боже мой, вознесый рог верных Твоих, Блаже,
и утвердивый нас на камени исповедания Твоего.

Рекоша святая уста Твоя, Господи, просите прежде Царствия Божия и сия вся
приложатся вам, темже молимся, даруй рабом Твоим причастие со святыми.

Истинно верующе евангельскому гласу, еже рече Господь, просите и дастся вам,
ищите и обрящете, и мы ныне молим Тя, Христе, и просим, даруй рабом Твоим благопребывание
в житии и небесных Твоих благ восприятие.

Слава: Троице святая единосущная, сохрани рабы Твоя от противныя силы и всякия напасти,
радость творя им душевную и телесную, презря им вся согрешения.

И ныне: Услыши, Пречистая, моления наша и спаси рабы Твоя, Госпоже, и вся яже ко спасению
прошения им подаждь, Правительница им буди ко спасенному пути.

Припев: Сохрани от бед раб Твоих, питающих нас, милостиве, яко усердно к Тебе прибегаем,
к милостивому избавителю и всех Владыце, Господу Иисусу.

Песнь 4.

Ирмос: Христос моя сила, Бог и Господь, честная Церковь боголепно поет взывающи,
от смысла чиста, о Господе празднующи.

Не презри твари Твоея, Владыко, яже создал руками Своими, не даждь прельщатися суетными
мира сего, но присно влагая в сердца раб Твоих Дух Твой Святый.

Иже Твоего ради Пресвятаго Имене, нас посещающим и питающим, и вся яже нам потребная подавающим,
подаждь им, Господи, вся яже ко спасению прошения и вечных даров наслаждение.

Слава: Безначальная Троице и Живоначальная, спаси вся и избави силою Твоею, мирная лета и
пространен живот рабом Твоим подаждь.

И ныне: Путь жизни Дево рождшая, на Него же настави рабы Твоя, творити божественная повеления
Сына Твоего, да в них ходяще, похоти плотския удаляемся молитвами Твоими.

Песнь 5.

Ирмос: Божиим светом Твоим, Блаже. Утреннюющих Ти души любовию озари, молюся:
Тя ведети, Слове Божий, истинного Бога, от мрака греховнаго взывающа.

Боже щедрый, милостивый Боже и Господи, по множеству благости Твоея, призри свыше,
Владыко Человеколюбче, на рабы Твоя и удиви милость Свою на них и спаси уповающих на Тя
от противящихся десницы Твоея, сохрани их яко зеницу ока.

Боже преблагий, посети нас обычным Твоим человеколюбием и молебную приими молитву от уст
грешных и помилуй, Владыко, на Тя надеющихся, сохрани и помилуй рабы Твоя, нас питающих,
да Тя вси яко Благодателя славим.

Слава: Превечному Отцу со Безначальным Сыном и Всесвятым Духом покланяемся во Единстве, непостыдным явитися рабом Твоим на Страшнем Суде Твоем, молимся деснаго стояния и благих восприятия сподоби.

И ныне: Подвигни, Чистая, Ангелы и Архангелы, Пророки и Мученики, Преподобныя и Святители на молитву к Сыну Своему и Богу, в день Судный рабом Твоим получити обетованных благ, и зде в житии исправление и неоскудную благодать

Песнь 6.

Ирмос: Житейское море воздвизаемое зря напастей бурею, к тихому пристанищу Твоему притек,
вопию Ти: возведи от тли живот мой, Многомилостиве.

Жития нашего дни яко сень преходят, но, Господи, даровал еси Езекии (2 Цар. 29, 32 гл., 4 Цар. 16, 19, 20 гл., Ис. 36, 38 гл.) приложения лета животу, даждь и сим рабом своим умножение лет и в них здравие и спасение.

Жития нашего время скоро течет, и дни лет наших яко дым расходятся, но, Господи,подаждь в приложение живота лет Твоим рабом, якоже иногда подавый Езекии, Твоему угоднику.

Слава: На престоле херувимсте Христе со Отцем седяи и с Духом нераздельно и от небесных сил неизреченно хвалу приемля, тех молитвами и всех безплотных, помилуй и спаси души наша.

И ныне: Яко Заступница сущим в бедах, тем же к Тебе прибегаем молящеся, спаси и ныне рабы Твоя Владычице от всякия напасти, бед и печали избави их, молитвами Твоими Пречистая Дево Богородице.

И припев как и по 3-й песни.

Кондак. Глас 6.

Не имамы иныя помощи, не имамы иныя надежды, разве Тебе Человеколюбца Христа Бога нашего, дело рук Твоих не презри, молящихся Тебе, низпосли благих Своих даров рабом Твоим, нас назирающим, на Тебе надеемся и Тобою хвалимся, Твои бо есмы раби да не постыдимся.

Икос.

Иже всех еси Отец преблагий Владыко, не затвори от нас щедрот Твоих, призри с небесе и виждь уповающих на безчисленное Твое человеколюбие и милосердие, не презри нас молящихся о рабех Твоих, нас посещающих и питающих , имене ради Твоего святаго свободи их от всякия нужды и гнева, и пленения и скорби и даруй им житие мирно и безмолвно, безболезненно и невредно Твои бо есмы раби да не постыдимся.

Песнь 7.

Ирмос: Росодательну убо пещь содела Ангел преподобным отроком, Халдеи же опаляющее веление Божие, мучителя увеща вопити: благословен еси , Боже отец наших.

Паче всех приемый две лепте убогия оныя вдовицы, Ты и сие Господи приими подавание, еже к нашей худости творят и даждь седмерицею в недра их, великую Твою милость.

С небесе Твою милость подаждь нам Христе, надеющимся на Тя, и просим грешнии и недостойнии, даруй милости Твоя богатые, еже к нам убогим милость показующим стократицею тем даруй на земли благая и вместо земных небесная.

Слава: Отче и Сыне и Святый Душе, Тебе верно покланяемся Твоея требуя милости рабом Твоим подаждь нас назирающим вместо земных небесная, и вместо временных вечная благая.

И ныне: Во всех сыи грешнее есмь, на небо воззрети не смею, но к Тебе прибегаю и, Владычице Мати Божия Пречистая, рабы Твоя Госпоже нас питающих избави вечнаго мучения.

Песнь 8.

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети: Тя превозносим во вся веки.

Милостиве человеколюбче Господи, всего мира грехи взимая, и сих отданию сподоби и отпусти рабом Твоим нас упокоившим всякое прегрешение, вольное и невольное все иже сотвориша ведением и неведением или словом или помышлением.

Воззрите на птицы небесныя, еже рече Господь, яко Отец небесный питает их и мы грешнии и недостойнии Владыко Твои раби на Тя, Небеснаго Отца , уповаем хлеб наш по вся дни даждь нам и отпусти рабом Своим, нам вся согрешения наша и не введи нас во искушение, но избави нас от лукаваго.

Слава: Господи иже преподобный Свой Дух апостолом Твоим послав, того Благий не отыми от сих рабов Твоих и обитель в них сотвори волею Твоею. Троице Святая, спаси любящия Тя верою Твоя служители.

И ныне: Явленная от века всем христианом Заступнице и во благих ходатаице о мире Владычице приими молитву и донеси Сыну Своему и Богу нашему спаси рабы Твоя любящия Тя от всякия напасти и диаволя искушения.

Песнь 9.

Ирмос: Бога человеком невозможно видети, на Негоже не смеют чини Ангельстии взирати: Тобою же, Всечистая, явися человеком Слово воплощенно, Егоже величающе, с небесными вои Тя ублажаем.

Множество благости Твоея долготерпеливе Господи, щедрот неодержимая пучино, помилуй раб Твоих, упокоивших нас и напитавших, презри согрешения их, и от напрасных напастей скоро заступи и души их во освящении соблюди молитвами Пречистыя Твоея Матере.

Бога плотию родила еси, Владычице, и рождши питаеши Питающаго, и Дающаго пищу всякой плоти, и нас питающих не лиши мзды своея, умножи всякаго блага на пользу всем стократицею, и даруй им получити жизнь вечную.

Слава: О Всемилостивая Всесвятая Троице, помилуй рабы Твоя, нас милующих, даждь им довольная по множеству милости Твоея , и домы их наполни всякаго блага, воздаждь им, Господи, вместо тленных нетленная.

И ныне: За вся христианы помолися, Владычице, со всеми святыми непрестанно, о избавлении града сего и всякаго града и страны, и верою живущих в них, любящим же нас воздаждь богатыми дарами.




Достойно есть. И поклоны, елико хощеши.

К о н е ц    и    Б о г у    с л а в а .